Гадаад харилцааны сайд Б.Батцэцэг манай улсад албан ёсны айлчлал хийж буй Их Британи, Умард Ирландын Нэгдсэн Хаант Улсын Гадаад хэрэг, хамтын нөхөрлөл, хөгжлийн сайд Дэвид Камеронтой өчигдөр /2024.04.25/ орой албан ёсны хэлэлцээ хийсэн байна.
Тодруулбал, Их Британийн Ерөнхий сайд асан, өдгөө тус улсын Гадаад хэрэг, хамтын нөхөрлөл, хөгжлийн сайдын албан тушаалыг хашиж буй Дэвид Камероны манай улсад хийсэн албан ёсны айлчлалын үеэр, "манай хоёр улс хамтын ажиллагааг иж бүрэн түншлэлд хүргэх замын зураглал, Монгол Улсад ховор металлын чиглэлээр хамтран ажиллах тухай, мөн геологийн салбарт хамтрах тухай санамж бичиг"-т гарын үсэг зурсан байна.
Энэ талаар Гадаад харилцааны яамны албан ёсны мэдээлэлд, "Албан ёсны хэлэлцээний үеэр талууд өнгөрсөн 60 жилийн хамтын ажиллагааны ололт амжилтаа бататгах, харилцааны түвшнийг ахиулах, бүх салбарт харилцан ашигтай хамтын ажиллагааг өрнүүлэхийн төлөө байгааг нотлов. Мөн хоёр орны харилцааны талаар дэлгэрэнгүй ярилцаж, хамтын ажиллагааг худалдаа, эдийн засаг, соёл, боловсрол, аялал жуулчлал, цахим засаглал, геологи зэрэг салбарт өргөжүүлэхээр тохиролцлоо.
Түүнчлэн Монгол Улсын урт болон дунд хугацааны хөгжлийн бодлого “Алсын хараа 2050”, “Шинэ сэргэлтийн бодлого” -д тусгагдсан зорилтууд болон “Тэрбум мод” үндэсний хөдөлгөөний зорилтуудын хүрээнд хамтран ажиллах боломжийн талаар ярилцлаа.
Албан ёсны хэлэлцээний дараа Гадаад харилцааны сайд Б.Батцэцэг, Гадаад хэрэг, хамтын нөхөрлөл, хөгжлийн сайд Дэвид Камерон нар “Монгол Улс, Их Британи, Умард Ирландын Нэгдсэн Хаант Улсын хамтын ажиллагааг иж бүрэн түншлэлд хүргэх замын зураглалд гарын үсэг зурлаа" гэж мэдээллээ.
