Франц улсын Нант хотноо өнгөрсөн оны аравдугаар сарын 14-нд "Чингис Хаан Монголчууд Дэлхийг Өөрчилсөн нь" үзэсгэлэн нээлтээ хийсэн билээ.
Монгол, Франц улсын Ерөнхийлөгчдийн ивээл дор зохион байгуулагдаж, өчигдөр буюу тавдугаар сарын 5-нд хаалтаа хийсэн энэхүү үзэсгэлэнгийн хүрээнд 6 сар үргэлжилсэн монгол соёлын улирлыг зохион байгуулсан юм. Үүний хаалтын арга хэмжээ болгож, 2024 оны дөрөвдүгээр сарын 20, 21-ний өдрүүдэд Бретанийн Гүнгийн Цайз – Нант хотын Түүхийн Музейд зохион байгуулсан Монгол Соёлын Хаврын Наадамд 4500 орчим хүн оролцжээ. Үзэсгэлэнгийн амжилтыг илтгэх тоо баримтуудаас дурдвал, үзэсгэлэн дэлгэгдсэн хугацаанд нийт 200 мянга гаруй үзэгчид зорин ирж үзсэнээс гадна, үзэсгэлэнгийн каталог нь даруй 3 дахь хэвлэлтдээ ороод байна.
Соёлын улирлын 24 арга хэмжээгээр Нант хот 6 сарын турш Монгол соёлоор амьсгалж, 25 мянга орчим хүн Монгол оронтой язгуур урлаг болон орчин үеийн хөгжим, яруу найраг, монгол бичиг, уран зураг, кино урлаг, идээ ундаа, уран зохиол, бие биелгээ, соёлын биет бус өвөөр нь дамжуулж танилцсан билээ. Ийнхүү, Чингис Хааны үзэсгэлэнг 2023 оны 10-р сард нээгдсэнээс нь хойш 6 сар үргэлжилсэн Монгол соёлын улирал нь цар хүрээ, ач холбогдлын хувьд урьд хожид болж байгаагүй томоохон арга хэмжээ болж өнгөрлөө.
