Засгийн газраас малчдын амьжиргааг дээшлүүлж хөдөөгийн хөгжлийг дэмжих Шинэ хоршоо хөдөлгөөнийг эхлүүлж малчидтайгаа зөвлөлдөж байгаа талаараа ЗГХЭГ-ын дарга Д.Амарбаясгалан мэдээлэл хийлээ.
Тэрбээр, "Монгол Улс бол мал аж ахуйн орон. Гэвч сүүлийн жилүүдэд зах зээлд шилжсэнээс хойш сэргэлт аваагүй. Малчид дунд болон доогуур орлоготой гэж үнэлэгддэг болсон. Тийм учраас малчдаа дэмжих зорилготой Шинэ хоршоо хөдөлгөөнийг улс даяар эхлүүлж байна. Энэ хөдөлгөөний гол зорилго бол мал аж ахуйд хөрөнгө оруулалт хийх боломжийг урт хугацааны хөнгөлөлттэй зээлээр олгож байгаа явдал юм. Малчид нийлж нэгдэж хоршиж байж өөрсдийнхөө амьдралыг дээшлүүлэх амьжиргаагаа сайжруулах боломжтой.
Мөн уламжлалт мал аж ахуйн салбарт үзүүлж байгаа уур амьсгалын өөрчлөлтийн сөрөг нөлөөллийг бууруулах боломжтой. Малчид маань олон тооны малтай байж амь амьжиргаагаа залгуулдаг. Энэ салбарыг шинэчлэх шаардлагатай. Тиймээс нийлж хоршсоны үндсэн дээр нийт 50 сая хүртэлх төгрөгийг жилийн 6 хувийн хүүтэйгээр Зээлийн батлан даалтын сангаар 80-100 хувийн батлан даалт гаргуулж зээлэх, хамтдаа хоршиж хөрөнгө оруулалт хийх боломжийг олгож байна. Энэ хөтөлбөр тогтвортой хэрэгжүүлэх үүднээс хууль гаргаж хугацаагүйгээр батлуулсан" гэлээ.
