УИХ-ын чуулганы хуралдаан үргэлжилж байна. Хуралдаанаар Эрчим хүчний салбарын өнөөгийн байдал, "Шинэ сэргэлтийн бодлого"-ын Эрчим хүчний зорилт болон Засгийн газрын үйл ажиллагааны хөтөлбөрт туссан томоохон төсөл, арга хэмжээний хэрэгжилтийн явц, тулгамдаж байгаа асуудлын талаар Эрчим хүчний сайд Б.Чойжилсүрэнгийн мэдээллийг сонсож байна.
Энэ үеэр тэрбээр "Дутагдаж байгаа эх үүсвэрийг тархмал зургаан эх үүсвэрээр нэмэгдүүлэх төслийг хэрэгжүүлж байна. Эхнийх нь Амгалангийн дулааны цахилгаан станцын 116 гкл-иор нэмэгдүүлэх өргөтгөл. Гүйцэтгэгч нь шалгараад ажил нь явж байна. Улаанбаатар хотын хувьд борлуулж байгаа дулааны өртөг нь үйлдвэрлэж байгаа өртгийнхөө 40 орчим хувьтай тэнцэжж байна. 10 төгрөгний дулааныг дөрвөн төгрөгөөр зарж байна гэсэн үг. Тиймээс бид үнэ нэмэгдүүлэх эхний оролдлогыг хийсэн. Энэ өвөл ахуйн хэрэглээний дулаан, цахилгааны станцын хэрэглээг нэмж чадаагүй. Эдийн засгийн сэргэлт болж өсөлт гарсны дараа жилээс айл, өрхийн цахилгааны төлбөрийг нэмнэ. Өртөг нь зарлагаа нөхөхгүй байна.
Монгол Улсын 330 гаруй сумыг эрчим хүчээр хангаж байна. Сүүлийн хэд хоногт -30 градус давж хүйтэрсэн. Энэ өдрүүдэд ялангуяа арваннэгдүгээр сарын 29-ний 19:00 цагт төвийн бүсийн нэгдсэн сүлжээний оргил ачаалал 1441 мВт хүрлээ. Энэ нь өмнөх оны хамгийн их ачааллаас 54 мВт-аар буюу дөрвөн хувь, өнгөрсөн оны мөн үеийнхээс 134 мВт-аар буюу 10 хувиар их байна.
Энэхүү оргил ачааллын үед суурилагдсан бүрэн хүчин чадлаараа ажиллаж, ОХУ-аас 270 мВт-ын импортын цахилгаан эрчим хүч авч байж давлаа. Өөрөөр хэлбэл, дөрвөн жилийн хугацаанд Дулааны гуравдугаар цахилгаан станц, Дарханы дулааны цахилгаан станцын суурилагдсан хүчин чадлын нийлбэрээс ч өндөр давсан ачаалал нэмэгджээ. Сүүлийн жилүүдийн оргил ачааллыг давахад Дулааны дөрөвдүгээр цахилгаан станцын 89 мВт, Эрдэнэтийн дулааны цахилгаан станцын 35 мВт, Дарханы дулааны цахилгаан станцын 35 мВт-ын өргөтгөлүүд ашиглалтад орсон нь ихээхэн үүрэг гүйцэтгэж байна.
Монгол Улсын хэмжээнд энэ оны эхний есөн сарын байдлаар 7.1 тэрбум кВт.цаг цахилгаан эрчим хүч үйлдвэрлэж, 6.5 тэрбум кВт.цаг цахилгаан эрчим хүчийг түгээсэн байна. Нийт түгээсэн цахилгаан эрчим хүчний 76.9 хувийг дотоодын эрчим хүчний эх үүсвэрээс, 23.1 импортын цахилгаан эрчим хүчээр тус, тус хангасан байна. Импортын цахилгаан эрчим хүчний 29.3 хувийг ОХУ-аас, 70.7 хувийг БНХАУ-аас импортолжээ" гэлээ.
