Гадаадын улс орнууд дэлхий нийтийг хамарсан “Ковид-19” цар тахалтай тэмцэх хүрээнд өөрийн иргэдээ дархлаажуулалтад хамруулахын зэрэгцээ тухайн улсад оршин суугаа гадаадын иргэдийг ялгаварлахгүйгээр адил тэгш нөхцөлөөр дархлаажуулахыг ДЭМБ-аас зөвлөж байгаа билээ. Энэ хүрээнд Монгол Улсад байнга оршин суугаа гадаадын иргэдийг дархлаажуулалтад сайн дурын үндсэн дээр хамруулж эхэлсэн байна.
Эхний ээлжид Улаанбаатар хотод байгаа гадаадын иргэд өөрийн оршин суугаа газарт ойр байрлах цэгт гадаад паспорт болон оршин суух үнэмлэхээ авч очин вакцинд хамрагдах юм. Гадаадын иргэн, харьяатын газраас өгсөн мэдээллээр Монгол Улсад өнөөдрийн байдлаар 14,500 орчим гадаад иргэн байнга оршин сууж байгаа аж.
